تغريدة عابرة, وتعاوني مع محمصة سويل
قصة تغريدة عابرة قادت لتعاون لطيف جداً
السلام عليكم ورحمة الله وبركاته.
الله يحييكم في نشرة بـــرقيـة البــــريدية. اذا فاتتك البرقيات الماضية يمكنك استعراضها من هنا:
كيف قادت تغريدة لمشكلة تواجهني لتعاون مع محمصة سويل
أنا شخص أحب القهوة ولا أقول أني مدمن ولكني أهتم بكوب القهوة اليومي, ليس لدرجة اني اقطر الماء مع عقارب الساعة ولكن من ناحية مقدار القهوة مع الماء والمحافظة على القهوة وتاريخ الحمصة وايحاءاتها. هالتفاصيل البسيطة اللي مهم تعرفها ولاتجعل منك خبير هي ما أعرفه. المهم في يوم كنت أبحث عن أفضل الطرق لحفظ القهوة ووجدت حافظة قهوة على أمازون.
المشكلة في هذه الحافظة أنني لن أعرف نوع القهوة الذي وضعته فيها! كيف؟ يعني أنني وكأغلب محبي القهوة لدي محاصيل مختلفة من محامص مختلفة, فإذا قمت بشراء حافظة كيف سأعرف أي محصول في هذه الحافظة خصوصاً وأن الحافظات كلها تشبه بعض؟!
أعلم أنني أستطيع أن ألصق ورقة مكتوب عليها اسم المحمصة والمحصول ولكن لأني مصمم وكأغلب المصممين (موسوسين جمالياً), كتبت تغريدة منشنت فيها بعض المحامص اللي أعتدت أن اشتري منهم في دعوة لتصميم إستيكرات او ملصقات بإسم البراند حتى يتنسى لمن لديه حافظة قهوة أو يحفظ القهوة في مكان غير الكيس الذي تأتي معه أن يعرف ويخصص كل حافظة لنوع محصول خاص أو محمصة خاصة.
وبعدها بفترة قصيرة وصلني رد من محمصة سويل كان كالتالي:
ملصقنا موجود على كيس البن, لكن وش رايك تصمم لنا أنت اللي تشوفه مناسب؟
ما أخفيكم أني من المعجبين بهوية محمصة سويل وقطعاً ليسوا بحاجة مصممين ولكن في ظني قالوا “خلونا نشوف وش عنده ذا”. المهم تواصلنا عن طريق الرسائل الخاصة, وأرسلوا لي دليل هويتهم البصرية وما حددوا أي تفاصيل ثانية ولسان حالهم “انطلق وورنا وش تقدر تسوي”.
ماأخفيكم -وحدة ثانية- أني بديت أقلق شوي وأحاول أشوف تصاميم لإستيكرات, ولكن حبيت أطلع بشيء مختلف, لأنهم براند مختلف, بسيط, وقوي في نفس الوقت. كانت هذي النقاط اللي حاولت أشتغل عليها وأحاول اني ما أطلع بشيء شاطح لايتناسب مع نبرتهم وشخصيتهم وبرضوا يكون له قيمة عند الشخص اللي تصله هذه الإستيكرات وممكن يتحفظ فيه أو يصوره وينشره وبرضوا وهو الأهم والسبب من التغريدة ان شعار سويل يكون موجود أو شيء منه حتى يحل المشكلة التي كانت لدي في المقام الأول.
قمت بعمل أكثر من 25 تصميم استيكر, ولكن أرسلت لهم حول الـ 18 تصميم, التصاميم اللي أقنعتني وشعرت أني توفقت في تنفيذها وتنطبق عليها الشروط السابقة. حاولت أعرف من ممكن يكونون الأشخاص اللي يشربون قهوة سويل؟ قيمرز؟ مهووسين بالإنتاجية؟ محبين للكتب والقراءة؟ حاولت أصيد جوهم :)
المهم بعد ارسالها لهم بأقل من 24 ساعة تم الرد علي برسالة شكر وإعجاب بالتصاميم وأنهم بياخذون وقتهم في اختيار التصاميم اللي تعجبهم وبيردون علي. (هنا أسوء شعور عند المصمم انه يحس ان العميل ورط معاه والمصمم مو قادر يجيب اللي في راسه بس العميل ذوق ولبق كفاية انه مايقول لك كلام يجرحك وأن تصاميمك مافيها ولا واحد أعجبنا) هنا بدأت أوسوس. لكن اليوم التالي مباشرة ارسلوا لي أنهم اختاروا 4 تصاميم وأعجبتهم ويريدونها جاهزة للطباعة.
المصمم يعرف وش معنى أنك تشوف شغلك بين أيدي الناس, فما بالك براند كبير مثل محمصة سويل ومقدار الإنتشار لهم يعني تصاميمك بتوصل أماكن ولأيدي ناس أكثر وبتتصور أكثر, وبالفعل هذا اللي حصل.
الصورة التالية فيها التصاميم اللي (أدبياً) يحق لي الإفصاح عنها لأنهم طبعوها ونشروها في قنوات التواصل الإجتماعي. يوجد تصميمين آخرين لي, لم يتم نشرها بعد.
اذا تم نشرها وطباعتها سوف أقوم بتحديث لهذه التدوينة أو سأرسلها في تدوينة أخرى.
للتوضيح: ليست كل الإستيكرات في الصور لي, الإستيكرات التي عملت عليها هي فقط الإستيكر العلوي يمين في أعلى الصفحة (الشكل اللي مثل العيون وبداخلها قلوب) وهو مستلهم من حرف الـ (أو) اللي في الشعار قمت بقلب الحرف واضافة القلوب, بالإضافة الى الاستيكر الانجليزي النصي I’m Soiler.
الإستيكر الأخير (آيآم سويلر) تم طباعته على أكياس توزيعات وهالشيء أسعدني زيادة مما يعني (في ظني) أن التصميم والفكرة أعجبتهم وقاموا بإستخدامها لأغراض أخرى غير الملصقات. كعادتهم سويل مبدعين :))
في الأخير, أقول بأني سعدت جداً بالعمل مع براند مثل سويل, وسعيد بأن يرتبط اسمي بإسمهم. لأني صدقاً حتى من قبل العمل معهم معجب جداً بمنتجاتهم ومحاصيلهم وإبداعهم في حملاتهم الإعلانية أو الهويات البصرية الخاصة التي يقومون بها في مواسم خاصة مثل موسم رمضان أو الأعياد أو المناسبات الوطنية. يتميزون في كل شيء ماشاء الله تبارك الله.
اذا كان عندك فضول تعرف حافظة القهوة, فهي هذي من موقع أمازون وهذي برضوا.
ملاحظة أخيرة: جميع الصور في هذا الموضوع مأخوذة من حساب محمصة سويل في الإنستقرام والحقوق محفوظة للأشخاص اللي صوروها وليس لي إلا الاسكرين شوت :)
انتهى
تغريدات قد تهمك:
كم يأخذ المصممين على تصميم شعار فقط؟ (تصويت لـ 76 مصمم)
حركة لطيفة من تويتر (اكس) تذكرك بما حفظته في العلامات المرجعية ونسيته في الغالب.
*
شكراً لكم لمشاركتي هذه الرحلة التعليمية, وأتمنى ان هالنشرة كانت تستحق وقتك.